Breyt­ingar á sam­þykkt­um EFÍA

Í byrjun júní, að undangenginni kynningu á ársfundi EFÍA, kusu sjóðfélagar um samþykktabreytingu sem mun heimila sjóðfélögum að taka hálfan lífeyri kjósi þeir svo. Breytingin leiðir af lögum um almannatryggingar sem tóku breytingum um síðast liðin áramót. Breytingin fól í sér möguleika lífeyrisþega á að taka hálfan lífeyri frá Tryggingastofnun án skerðinga gegn því að lífeyrisþegi sé einnig að fá hálfan lífeyri frá öllum lífeyrissjóðum sem hann á réttindi í. Lög um almannatryggingar setja þó það skilyrði að samanlagður hálfur lífeyrir frá lífeyrissjóðum og Tryggingastofnun jafngildi að lágmarki lágmarkslífeyri samkvæmt lögum um almannatryggingar á hverjum tíma.