Barnalífeyrir

Hafi sjóðfélagi greitt til sjóðsins í að minnsta kosti 24 mánuði á undangengnum 36 mánuðum eða 6 mánuði af undanfarandi 12 myndast réttur til barnalífeyris. Barnalífeyrir er greiddur með hverju barni sjóðfélaga undir 24 ára aldri, ef sjóðfélagi er látinn eða örorkulífeyrisþegi.

Fósturbörn, stjúpbörn og kjörbörn sjóðfélaga öðlast sama rétt til lífeyris hafi þau verið á framfæri sjóðfélaga við andlát/orkutap. Ef orkutap er minna en 100% skerðist barnalífeyrir í samræmi við örorkuprósentu. Barnalífeyrir er greiddur með barni til 24 ára aldurs. Barnalífeyrir er greiddur til framfæranda barns til 18 ára aldurs, mánaðarlega, eftir á.

Fullur barnalífeyrir er greiddur ef árleg lágmarksupphæð undanfarin tvö almanaksár fyrir orkutap eða andlát nær 600.000 krónum. Eins er greiddur fullur barnalífeyrir hafi lífeyrisþegi í sjóðnum átt mánaðarleg réttindi að lágmarki 120.000. Sé iðgjaldastofn eða lífeyrisréttindi innan við helmingur af framantöldum upphæðum fellur barnalífeyririn niður.

Upphæð barnalífeyris fer eftir því hvort hann er greiddur vegna örorku eða andláts sjóðfélaga.

• Ef um örorku sjóðfélaga er að ræða er fullur barnalífeyrir 9.000* krónur á mánuði með hverju barni sjóðfélaga (og er 12.488 kr. á mánuði vegna ársins 2012) eða 10% af úrskurðuðum örorkulífeyrir, hvort sem er hærra.
• Ef um andlát sjóðfélaga er að ræða er fullur barnalífeyrir 12.250* krónur á mánuði með hverju barni sjóðfélaga ( og er 16.997 kr. vegna ársins 2012) eða 20% af makalífeyrisréttindum, hvort sem er hærra.
• Upphæðir þessar breytast árlega í hlutfalli við breytingu á vísitölu neysluverðs miðað við grunnvísitölu 281,8 stig.

Sækja þarf um barnalífeyri skriflega á eyðublaðinu: Umsókn um útgreiðslu barnalífeyris. Sé sjóðfélagi einnig að sækja um maka eða örorkulífeyri samhliða má sækja um barnalífeyri á eyðublöðunum: Umsókn um útgreiðslu maka og barnalífeyris eða Umsókn um útgreiðslu örorku og barnalífeyris.

Umsóknir má finna á forsíðu undir flipanum Umsóknir. Jafnframt er sérstök móttaka sjóðfélaga EFÍA í Aðalútibúi bankans að Laugavegi 120 og eru sjóðfélagar hvattir til að nýta sér þá þjónustu.

Barnalífeyrir úr EFIA greiðist út samkvæmt samþykktum sjóðsins.