Lánareglur EFÍA

1. Allir sjóðfélagar sem hafa greitt iðgjöld til EFÍA geta fengið lán úr sjóðnum.

2. Lánin eru með jöfnum greiðslum eða jöfnum afborgunum, verðtryggð með vöxtum sem eru breytilegir og taka mið af meðalávöxtunarkröfu íbúðabréfa HFF 34 síðustu þrjá almanaksmánuði að viðbættu vaxtaálagi sem stjórn ákveður, nú 0,75 prósentustig. Vextir eru endurskoðaðir fjórum sinnum á ári, þ.e. 15. janúar, 15. apríl, 15. júlí og 15. október. Vextir af sjóðfélagalánum geta lægst orðið 3,75%.

3. Verði skuldaraskipti á láninu og nýr skuldari er ekki sjóðfélagi hækka vextir lánsins um 1,0 prósentustig. Undanþegnir þessu skilyrði eru þeir sem fá greiddan lífeyri úr sjóðnum.

4. Lánstími er 5-40 ár og gjalddagar 2-12 á ári. Lántakendur greiða kostnað af greiðslu afborgana skv. gjaldskrá Arion banka. Lánin eru uppgreiðanleg án kostnaðar hvenær sem er á lánstímanum. Hámarkslánveiting er 40 milljónir.

5. Fasteignaveð í eigu skuldara þarf að vera til tryggingar láninu og er veðsetning að hámarki 65% af metnu markaðsverði íbúðarhúsnæðis. Veðsetning má þó aldrei vera hærri en 100% af brunabótamati.

6. Með umsókninni þurfa að fylgja eftirfarandi upplýsingar um íbúðarhúsnæði:

• Nýtt veðbókarvottorð
• Afrit af síðustu greiðslukvittunum af þeim lánum sem hvíla fyrir á eigninni
• Afrit af þinglýstum kaupsamningi hafi eignin skipt um eigendur á síðastliðnum 12 mánuðum, eða áætlað markaðsverð að mati sérfræðings á lánaborði Viðskiptabankasviðs Arion banka hf. eða verðmat frá löggiltum fasteignasala sem EFÍA tilnefnir (í samráði við starfsmenn Arion banka hf.). Lántakandi greiðir kostnað vegna verðmats frá löggiltum fasteignasala ef um það er að ræða.
• Húseignir í smíðum þurfa að vera komnar með fokheldisvottorð ásamt smíðatryggingu og kvittun fyrir greiðslu gatnagerðargjalda
• Upplýsingar um brunabótamat og fasteignamat.

Framkvæmt skal greiðslumat ef veðsetning er umfram 30% og ber lántaki kostnað af því. Komi í ljós að skuldastaða sé með þeim hætti að vafi leiki á greiðsluhæfi lántakanda getur sjóðurinn lækkað umbeðna lánsfjárhæð eða hafnað lánveitingu.

7. Kostnaður við útgáfu skuldabréfs er skv. gjaldskrá Arion banka.

8. Ákvörðun um lánveitingar er tekin af lánanefnd EFÍA í samræmi við lánareglur og starfsreglur lánanefndar.

Umsókn ásamt fylgiskjölum skal skila til útibús Arion banka hf., Laugavegi 120 Reykjavík.

Þrátt fyrir ofangreindar lánareglur áskilur EFÍA sér rétt til að hafna lánsbeiðnum.